யாழ். பல்கலைக்கழகத் துணைவேந்தர் பதவிக்கு ஆறு பேராசிரியர்கள் போட்டி

யாழ்ப்பாணப் பல்கலைக்கழகத்தின் தற்போதைய துணைவேந்தர் பேராசிரியர் சி. சிறிசற்குணராஜாவின் பதவிக்காலம் அடுத்த ஆண்டு மார்ச் 24 ஆம் திகதியுடன் முடிவடையவுள்ள நிலையில், புதிய துணைவேந்தர் பதவிக்கு யாழ்ப்பாணப் பல்கலைக்கழகத்தின் ஆறு பேராசிரியர்கள் விண்ணப்பித்துள்ளனர். விண்ணப்பங்கள் சமர்ப்பிப்பதற்கான இறுதித் திகதி ஒக்டோபர் 15 அன்று நிறைவடைந்தது. இந்த ஆறு பேரில் நான்கு பேர் தற்போது பல்கலைக்கழகப் பீடாதிபதிகளாக உள்ளனர்.

உயர் பட்டப்படிப்புகள் பீடாதிபதி சிரேஷ்ட பேராசிரியர் தி. வேல்நம்பி, கலைப் பீடாதிபதி பேராசிரியர் சி.ரகுராம், மருத்துவ பீடாதிபதி பேராசிரியர் இ.சுரேந்திரகுமாரன், விஞ்ஞான பீடாதிபதி சிரேஷ்ட பேராசிரியர் பு.ரவிராஜன், உயர் பட்டப்படிப்புகள் பீடத்தின் முன்னாள் பீடாதிபதி சிரேஷ்ட பேராசிரியர் கு. மிகுந்தன் மற்றும் விஞ்ஞான பீடத்தின் முன்னாள் பீடாதிபதி பேராசிரியர் பிறின்ஸ் ஜெயதேவன் ஆகியோர் விண்ணப்பித்துள்ளவர்களின் பெயர்களாகும். பல்கலைக்கழக மானியங்கள் ஆணைக்குழுவின் சுற்றறிக்கையின்படி, டிசம்பர் மாதம் விசேட பேரவைக் கூட்டத்தில் புள்ளிகள் வழங்கப்பட்டு, அதிகப் புள்ளிகள் பெறும் முதல் மூன்று பேரின் விபரங்கள் ஜனாதிபதிக்கு அனுப்பப்படும். பல்கலைக்கழகச் சட்டத்தின்படி, இந்த மூவரில் ஒருவரை ஜனாதிபதி துணைவேந்தராக நியமிப்பார்.